Suroyo TV, Muxabarat d Suriya, Cito, Ḫasye, Qaše, ... 5

• Back to Forum •

Geschreven door Jan Beṯ-Şawoce op 2010-06-20 15:34:29:

Suroyo TV, Muxabarat d Suriya, Cito, Ḫasye, Qaše, ...
5



Naqla ẖreto, aṯi u qayţo... Cayn xëd kul qayţo, an noše, bdalle këmẖaḏri ruẖayye lašan d ëzzën laq qariwe w lar raẖuqe. Hawxa kowe kul šato gab aş şëroye ste. Kcuwdi i šato kula, knuţri lu qayţo, koṯe, lašan d ẖozën u ahël këzzën cayli lu aṯro. Hën l Suriya, hën lu Ţuro, hën l Lëbnan w hawxa.

Šato 2000. Cayle şërayto, babo, aṯto w barṯo cam ẖḏoḏe, bi ţiyara knuẖti më Stockholm lu Šam. Kmoţën, kmëfşoẖi ğalabe cal d maţën bu ´xer w bi salame´. Maẖwalle ap pasaportat dëṯṯe, ẖërre aclayye, kalën šawţo. Mëranne ”klawu šawţo,” kalën. Bëṯër mëranne ”b šayno aṯitu!” huwanne ap pasaportat xtime w xalişe. Malaxxe d maydi ač čantat dëṯṯe. Kalye knuţri lač čantat, aṯi l gabayye tre puwlës madaniye, mërre lu gawro ”Fayišlan šağle başiţa acmox, kibox d oṯët acmayna!” U zlam dlo ẖšowo d mede, azze acmayye. Macbarre l lawğël l gabayye, bdalle kmëžğoli acme, mamro basimo. ”Mën kit bu Swed, mën layt? Mën kcëwdët?” Huwalle qaẖwe. Bdele kšote eba. Kbësmo i žğaliye, ktaymo i qaẖwe. Ḫa map puwelës, amţele dosya ẖlëmto. Maẖtole cal i maşa. U rabo dap puwelës mërlele ”Ftaẖa, ẖur mën kit biyya!” Mnakëf, laḏëc mën d soyëm, ẖa map puwelës b zëmoţo acle mërlele ”Ftaẖa!”

Zayëc, mi zëcṯo mnawele iḏe, kruclo... Maclele i foṯo di dosya, bi warëqto qamayto ẖzele ëšme w kkoṯëw ”Taqarir can ...!” Mšawëš, bdela li zëcṯo d nëflo b lebe w bëṯër b gëšme kula. Bdalle këmšaylile šëwole kome w ẖëwore. B zëcṯo kmadcër aclayye, ”Hawxa mede layt lë ẖḏori. U mede dë kmaẖketu kule, latli calaqa buwwe. Cawodo, mu cwodo l bayto w mu bayto lu cwodo. Nadi mënyo, lë kuḏacno. Naqqat këzzi li cito, tamo, zëd mi şluṯo šarake latli. U mede d këmmitu, aš šëwole d këmšaylitu kulle, nëxroyene acli”.

Ap puwelës bdalle bu tahdit w bu maẖyo. Qarp w hay qarp. Rafso, dëkumo, lakmo, rëqto,.. mẖalëq li arco. Amţalle šawye w qërbače lu mẖoyo. Mëqqa dë mẖëlalle, xabro më feme lë nafëq. La´an maḏco cal mede latle. Mën gëd omër?

I naqqa d amţewolle l lawğël, tre puwelës madaniye, azzënwo qëm di aṯto w di barṯo ste. Mëranne ”Hul d oṯe u zlam, toxu ytawu harke bi odayaṯe. Štawulxu čay d ubcitu.” Labici. Mëranne ”kito maye ste d ubcitu”. Labici. Mšayëcanne niše lašan d qunci, qanici. Amţëlanne čay basimo. Štalle u čay dëṯṯe. Knuţri d oṯe u u zlam. Laṯi w laṯi. Fayiši bi odaye yatiwe l ruẖayye.

Emo w barṯo, at tarte, bdele kkoyëw rišayye, këtwo gabayye maye štalle, lë manfacle. Bi odaye këtwo qanafe lu ytowo, i barṯo šţiẖo acla. Emo labico bas lë qadiro acla. Hiyya ste jbiro d mëšţoẖo cal i qanafe ẖreto, la´an taqa haw fayišwola.

Hënne hawxa šţiẖe w tacibe amţalle u gawro l lawğël li odayaṯṯe. Mhadadde u zlam, ”Marlan ẖawronox manne? Cam man kcëwdëd bi siyase? W dlo, harke l qul caynox, gëd cumlina cam aṯtox w barṯox!”

Tre mam muxabarat šmëţte w azzën l riše dat tarte, hënne šţiẖe. Bdalle l qul du zlam kcëmli bënne; bi aṯto w bi barṯo. Azzën w aṯën aclayye hul d sawici. Mbadalle tre ẖrene aclayye. Hanëk ste azzën w aṯën aclayye ter dëṯṯe. Mbahdalle at tarte l qul du zlam.

U zlam latwole mede lo d omër w lo d obe. Blalyo bi cëtmo marfanne w azzën.


Aẖe w Aẖwoṯo,

Bu šëklano, kito bam mowat ẖadisat. Nošo lë kmajre maẖke. Mena hatike, mena caybo, mena cariye, mena nëkfuṯo w mena ste heš zëcṯo. Kuḏac hawxa, lë kmo caylat d aṯi u medano b rišayye. Sëmli w lë sëmli, labici d samno qëbolo acmayye bu tayp d këtli. Hën mac caylat, bëṯër mëd aḏici i niyayḏi latyo ẖarbuṯo alle, maẖkëlalli u mede d aṯi b rišayye. Bas abici meni ëšmo w dëkṯo d lëbeno. Harke gëd kuleno.

Bas gëd ţureno u xabro w u jawab cal ac caylatani lu muxbërji suri, tëltaḏ d aṯi l sidi, gëd mdawamno bu mede d maẖkëleli...

”Kul camil kobe taqrir cal man d hawi. Aṯto gawro lë kforëq. Hani klozëm d howën suriye. I naqqa d oṯën l Suriya, hani kmiadbi w bëṯër kducri lab botaṯṯe. Hën mënayye kowën cumala ẖaṯe, hën qawmiyin carab lu şalëẖ du ẖëkëm. Këmmënne ”Antun waţaniyun!” A ẖrene ste, kfayši lalin, mën d howe, mën d yoqëḏ lë ẖaruwwe më mede.

Bëṯër kul kuhno suri, jbari bu yarẖo gëd obe kmo taqrirat cal i citayḏe, cal i jamacayḏe w cal ak kuhnayḏe. Manyo maţico, manyo safiho, manyo cayne cal an niše, cal u kalla,... cal kul mede d kito.

Ablaẖad Gallo Šabo, huwle w kobe taqarir cal an noše w cal ak kuhne... Makuwle ğalabe noše bat taqarir d kobe. Huwle taqarir cal Diyosqoros Bënyamen mërle acle ’Haḏa waẖëd kërdi. Cëndu caqliye kërdiye,... Haḏa waẖëd qţaci, ğabi, bahim, jaban. Bidun qira wa kitaba, carabi ma biyëcrëf... huwwa mo carabi, ma bihëb al carab,…’

Ḫazayel Şawme, këmfatëš bu antarnat, man, mën kṯëwle, hani komtarjamme lu carabi w koballe li safara Suriye. Kmëstaclëm, yacni kmawḏacce lan noše d komëkṯëw aclayye. Hawxa kowën ẖzire, man w qay kokoṯaw aclayye.

Ḫazayel Şawme ste, heš huwwe dayroyo camil li dawle Suriye´we. Huwle taqarir ğalabe. Hawi ẖasyo, zëd huwle. Yaqëḏ ğalabe noše bat taqarirani.”

20-06-2010






Antwoorden:

• Back to Forum •